१५ महिना पछि दर्शकलाई अनमोल केसीको चलचित्र

काठमाडौ – चलचित्र निर्माण भन्दा प्रदर्शन गाह्रो छ । हरेक निर्माताले भन्ने शब्द हुन् यी । सायद त्यसैले होला पछिल्लो समय केही निर्माताहरु चलचित्रको छायाँकन पहिले प्रदर्शन मिति जुराउने गर्दछन् । यस्तै गरेको छ चलचित्र ‘कृ’ले पनि । फागुनको पहिलो साताबाट छायांकनमा जान लागेको अनमोल केसीको अभिनय रहने चलचित्र को ‘कृ’ नयाँ बर्षको भदौ १६ गतेबाट प्रदर्शनमा आउने भएको छ । निर्माता सुवास गिरीले चलचित्र छायाँकन अगाडी प्रदर्शन मिति फाइनल गरेको बताए । उनले विभिन्न सार्वजनिक बिदा र दशैलाई लक्षित गरेर भदौ १६ लाई प्रदर्शन जुर्याइएको बताए । चलचित्र सुरेन्द्र पौडेलले निर्देशन गर्दैछन् । सुवास इन्टरटेन्मेन्टको निर्माण र द सुपर काजोल फिल्मस्को प्रस्तुति रहने चलचित्रमा सुवास गिरी र अभिनेता भुवन केसीको लगानी रहने छ । चलचित्रको कार्यकारी निर्मातामा कमल गिरी, सह–निर्मातामा श्री पराजुली रहने छन् । चलचित्रमा अनमोलले नव–अभिनेत्री अदिती वुढाथोकीसँग रोमान्स गर्नेछन् । यहि चलचित्रका लागि नायक केसी अहिले शरीर बनाउन लागि परेका छन् । गत जेठ २८ गते अनमोल अभिनित चलचित्र ‘गाजलु’ रिलिज भएको थियो । त्यसपछि उनका चलचित्र आएका छैनन् ।